返工受氣時,朋友總會安慰你「人工包埋㗎」,但見工被鬧又是否「包埋」呢?有應徵者近日於社交群組「奴工處」投稿指,近日到一間體育用品公司見工時,被面試官辱罵5分鐘,大感無奈。

事主指出,面試官是一名四、五十歲、身型略胖的女人。面試時,她問事主對於自己有甚麼期望,事主直言想在公司裡擔當較資深的角色,「嘢都未講完佢即刻話:吓?你咁後生就想做senior?你啲嘢識晒啦?」事主表示面試官隨後5分鐘一直鬧他,大感無奈,「佢用咗5分鐘講我咁後生會唔會太過自信,話從我眼神睇得出唔係好需要呢份工同埋唔會頂得順佢,仲問埋我係咪獨子、屋企人做咩」。

無辜被鬧的事主指出,自己只是來見工,為何要受到這種對待,「阿嬸呀,我知你想寸我喺溫室長大,但其實後生唔係錯㗎,有野心有目標都唔係錯㗎,重點係我嚟見工咋,你未出糧畀我㗎」。

不少網民認為見工的情況如此惡劣,相信這份也並非好工,「典型老屎忽心態,覺得自己一定叻過晒啲後生」、「見工都咁樣,同佢做同事仲得了」、「好彩佢未請,你可以即場開佢波」、「如果面試要咁樣試人,呢啲工作機會留畀其他人好過啦」。

有網民則認為這是一種面試技巧,測試應徵者的忍耐力及對工作的投入度,「其實我反而覺得佢想試你,因為你話要做高層,佢就睇下你有咩反應,如果你仲係寸人哋未出糧就鬧我,咁你最好由低學起」、「見工多數問你屋人做乜嘢,你有無供樓,睇下你係咪家庭之柱/有無好重嘅家庭負擔,咁你會明白佢點解問咁多呢啲嘢」。